Thó-lūn:Ông Hiong-siân

王香禪。

王香禪，本名罔市，又名留仙、香嬋，表字黛卿，藝名夢癡。王香禪佇臺北大稻埕出世，是清朝佮日本時代臺灣真出名个藝旦參查某詩人。伊是連橫个弟子、謝介石个某。

生平

王香禪出身散赤，厝內个經濟攏靠怹阿兄王仔塗承擔。自細漢，伊就去予董仔治收做契囝。香禪開始佇平樂遊酒樓佮福州仔師父學北曲。十一歲个時陣，香禪透過詩人王子鶴个介紹，去到大稻埕个劍樓書塾向趙一山學寫香奩詩，教學黃任个〈香草箋偶註〉。香禪因為佮意讀《紅樓夢》，欣羨主角林黛玉，所以共表字號做黛卿。彼當陣，香禪予儂號做「臺灣三大美人」之一，踮大稻埕永樂座唱京戲，連橫逐工攏走去遐共捀場。香禪嘛捌到臺南寶美樓表演〈二進宮〉、〈三娘教子〉佮〈祭江〉，真濟仕紳攏為伊癡迷。香禪蹛佇臺南个時陣，連橫正式收伊做弟子，教伊《詩經》、《楚辭》佮李商隱个詩集，連橫閣呵咾伊講：「今則斐然成章，不減謝庭詠絮。」猶毋過，兩儂並無結婚，香禪後來嫁予羅秀惠，寫詩〈問花〉。但是過無偌久，羅秀惠煞放捒伊，走去佮蔡碧吟鬥陣，兩儂從此離緣。香禪真慼心，開始大量寫詩，用「黛卿」做筆名，投予臺灣日日新報，親像〈秋感〉、〈書懷〉、〈梅妃〉佮〈和梅妃韻〉就攏是彼當時个作品。