Thó-lūn:Jī-jī-pat Sū-kiāⁿ

Wikipedia (chū-iû ê pek-kho-choân-su) beh kā lí kóng...
(Tùi 二二八事件 choán--lâi)
跳至導覽 跳至搜尋

二二八事件[kái goân-sú-bé]

tóng-àn:228 memorial.jpg
臺北市"二二八和平公園"內的二二八紀念碑

二二八事件(228事件),表面上看起來是一場1947年2月27發生佇臺北的官民糾紛,是公賣局查緝員取締走私薰所引起,毋過,事件的暴發有伊背後的原因,基本上會使看做是在地的臺灣人佮國民政府派來接收臺灣的外省人的一場族群衝突,228事件的發生,對後來臺灣獨立運動有真大的影響。

事件的經過[kái goân-sú-bé]


1947年2月27日,臺灣省專賣局的查緝員傅學通六人佮四个警察,佇臺北市南京西路的天馬茶房(現此時的延平北路)頭前, 蹧躂賣私薰的四十歲寡婦林江邁,佇相諍的過程中,林婦人人予銃拍著頭殼流血,邊仔的查某囝嘛驚甲哭起來,看著的市民氣怫怫,煞共查緝員包起來,傅查緝員佮做伙的人開銃警告,不幸誤殺拄好佇樓跤看鬧熱的市民陳文溪,掠狂的群眾佇彼暝隨時共警察局包起來,要求愛辦兇手,毋過攏無得著滿意的答案,第二工開始,臺北市罷工、罷市,眾人向行政長官公署請願、示威,真不幸閣發生公署的衛兵開銃,造成傷亡,民眾的心情愈來愈激恨,著按呢,按三月初一起,暴發全島性的反抗政府事件。

受氣的群眾聚集佇臺北市市中心。

一寡零星的暴動無算,遮的反抗事件會使講主要按兩大路線咧行:第一種是政治交涉路線;第二種是武裝抗爭路線,佇一方面,臺北佮其他所在的民意代表佮社會名流、士紳紛紛組成二二八事件處理委員會(簡稱處委會)佮行政長官陳儀協商、談判,而且對陳儀提出逮捕貪官廢除行政長官公署,實行自治,佇行政司法軍事各方面用臺灣人等等的要求,另外一面,佇臺中嘉義斗六高雄花蓮遮的所在,出現一寡民間力量開始收繳銃機、組民兵,用武力抗爭,中央上出名的是前臺共領袖謝雪紅佇臺中的27部隊

二二八事件的元兇[kái goân-sú-bé]


二二八事件佇臺灣一直是袂使討論的題目,到1987年才有人敢公開討論,二二八事件的元兇嘛攏無人敢講。

1987年二二八事件40周年,由鄭南榕、陳永興佮李勝雄等人所發起的二二八公義和平運動,二二八事件才會當公開討論,二二八事件的責任問題一直攏無人敢講,佇1947年楊亮功佮何漢文的報告講事件是臺灣的暴民來造成的,公義和平運動推捒了後佇1992年行政院的二二八事件調查報告就無講是「暴民」囉,2003年由財團法人二二八事件紀念基金會來做二二八事件的責任歸屬問題,根據公開的資料佮受難者家屬的採訪,佇2005年完成報告指出:二二八事件的元兇(最大責任者)是國民政府主席蔣介石。

二二八事件的影響[kái goân-sú-bé]


彼當時佇聯合國服務的Dr. M. Ottsen佇臺南親目睭看著國民黨的軍隊佇水龍車等架設機關銃

根據李筱峰的研究,佇這擺事件之中,無論是政治交涉路線,抑是武裝抗爭路線,怹提出的訴求,干焦到高度自治爾爾,佇國家認同這勻,基本上猶原以大中國,並無臺灣獨立的要求,毋過,佇這擺的事件了後,因為國民黨政府殘酷的刣死真濟臺灣人,臺灣人佮中國人隔閡愈來愈深,臺灣人想欲追求家己一个獨立國家的想法,煞漸漸產生,會使講,二二八事件是臺灣獨立運動的起點,美國學者Meisner捌按呢表示:二二八這个詞,毋但是海外流亡的臺灣獨立團體的口號,而且是一个喚起所有臺灣人個人悲慘經驗的一个象徵,臺灣作家李喬嘛捌按呢表示:

二二八事件是臺灣歷史頂懸,死傷上濟上悲慘,影響上大、上深的歷史事件,二二八已經變做臺灣人共同的惡夢,族群共同潛意識;臺灣人的意識、精神、情操、人間形象、人生理想、藝術創作、價值觀等等,攏隱隱包有二二八的因素在內。

二二八事件的受難者[kái goân-sú-bé]


...等等

外部連結[kái goân-sú-bé]

Wikimedia Commons téng ê siong-koan tóng-àn: 228 Incident of Taiwan, 1947