Bēng Boán-chiu

Wikipedia (chū-iû ê pek-kho-choân-su) beh kā lí kóng...
跳至導覽 跳至搜尋
Bēng Boán-chiu

Bēng Boán-chiu (孟晚舟) sī chi̍t ūi Tiong-kok seng-lí-lâng, hiān-jīm Hôa-ûi kong-si ê hù-táng-sū-tiúⁿ kiam châi-bū-tiúⁿ. I sī Hôa-ûi chhòng-pān-jîn Jīm Chèng-hui hām tē-it ê bó͘ Bēng Kun (孟軍) ê cha-bó͘-kiáⁿ.

1993 nî ka-ji̍p Hôa-ûi kong-si. 1997 nî, tī Hôa-tiong Lí-kang Tāi-ha̍k tha̍k se̍k-sū. I tī pit-gia̍p āu tò-tńg khì Hôa-ûi siōng-pan, bat chò kòe Hôa-ûi kok-chè hōe-kè-pō͘ chóng-kàm, Hôa-ûi Hiong-káng kong-si châi-bū-tiúⁿ kap tiòng-bū koán-lí-pō͘ chóng-chhâi. 2011 nî 4 goe̍h, i chiâⁿ-chò Hôa-ûi siông-bū táng-sū kiam châi-bū-tiúⁿ. 2018 nî 3 goe̍h, seng-jīm hù-táng-sū-tiúⁿ kiam châi-bū-tiúⁿ, mā sī hiān-sî Hôa-ûi kî-hā 11 keng kong-si ê táng-sū.

2018 nî 12 goe̍h chhe 1, Ka-ná-tāi kéng-hong èng Bí-kok chèng-hú ê su-hoat hō͘-chō͘ iau-kiû tái-pó͘ tī Un-ko-hôa choán-ki ê Bēng Boán-chiu, ín-hoat khan-sia̍p Bí-kok, Tiong-kok, Ka-ná-tāi 3 kok ê su-hoat, chèng-tī, gōa-kau sū-kiāⁿ. 2019 nî 1 goe̍h 28 hō, Bí-kok soan-pò͘ chèng-sek iau-kiû ín-tō͘ Bēng Boán-chiu, í 23 hāng chōe-miâ khí-sò͘ Hôa-ûi.