Goân-khik
Guân-khik(元曲) sī Tiong-kok Guân sî-tāi ê hì-khik kah tsa̍p-kio̍k ê tsóng-tshing. Siong-tuì Lâm-khik, Guân-khik mā kiò-tsò Pak-khik(北曲). Guân-khik kah Tông-si iáu-koh ū Sòng-sû sann tsióng bûn-thé ū kāng-khuán ê bûn-ha̍k tē-uī. In-uī Guân-khik ê bûn-jī lóng khah tshoo-sio̍k, sóo-í mā ū Ok-siàu(惡少) ê kiò-huat. Lâm Sòng buán-kî, siā-huē hui-siông bô an-ún, íng-hióng tio̍h Guân-khik ê tshòng-tsok. Guân-khik tsok-ka khai-sí iōng "tsîng-su" lâi biô-siá sè-kan; āu--lâi ê Sù-tāi pi-kio̍k(四大悲劇) tsiū-án-ne tshòng-tsok tshut-lâi, hun-pia̍t sī:
- Kám-thian-tōng-tē Tōo-ngôo uan (感天動地竇娥冤)
- Phò-iu-bōng koo-gān Hàn-kiong tshiu (破幽夢孤雁漢宮秋)
- Tông-bîn-hông tshiu-iā ngôo-tông ú (唐明皇秋夜梧桐雨)
- Tiō--sī koo-jî (趙氏孤兒).
Guân-khik tsok-ka tang-tiong, ū 4 uī tsin tshut-sik, in-tshú in tō ha̍p-tshing tsò Guân-khik sù-tāi ka(元曲四大家), hun-pia̍t sī Kuan Hàn-khing(關漢卿), Pe̍h Jîn-hú(白仁甫), Má Tì-uán(馬致遠), kah Tēnn Kong-tsóo(鄭光祖). Līng-guā iáu-koh ū Ông Si̍t-hú(王實甫), Kiâu Kiat(喬吉), Tiunn Khó-kiú(張可久), Kí Kun-siông(紀君祥), Tiunn Ióng-hō(張養浩), kah Ko Bûn-siù(高文秀), mā lóng sī tsin tshut-miâ ê Guân-khik tsok-ka.