Thóng-it Khì-gia̍p
Thóng-it Khì-gia̍p (統一企業; Eng-gí: Uni-President) sī Tâi-oân ê chia̍h-mi̍h kong-si, chóng-pō͘ tī Tâi-lâm-chhī Éng-khong-khu Iâm-hâng. 1967 nî sêng-li̍p, 1987 nî 12 goe̍h 28 tī Tâi-oân Chèng-kǹg Kau-e̍k-só͘ chhiūⁿ-chhī, tāi-hō sī 1216. Kong-si tiong-sim ê Thóng-it Khì-gia̍p Chi̍p-thoân, sū-gia̍p phau-koat-liáu ē-pôaⁿ, chhù-phòe, bō͘-e̍k, kiàn-siat téng-téng léng-he̍k.
Le̍k-sú
[siu-kái | kái goân-sí-bé]- 1967 nî Thóng-it Khì-gia̍p Kó͘-hūn Iú-hān Kong-si tī Tâi-lâm-koān Ha̍k-kah-tìn (chín ê Tâi-lâm-chhī Ha̍k-kah-khu) khui-gia̍p, siōng khí-seng seng-sán mī-hún kah chhī-liāu. Táng-sū-tiúⁿ sī Ngô͘ Siu-chê (吳修齊), Chóng-keng-lí sī Ko Chheng-goān (高清愿).
- 1969 nî kai-sí tiû-pī beh seng-sán phàu-mī, chham Nissin Chè-hún lâi ki-su̍t ha̍p-chok. Lō͘-bóe tī Thài-kok tâu-chu siat-li̍p kang-tiûⁿ, koh tī Hiong-káng siat-li̍p keng-siau-siong.
- 1972 nî hun-chò 4 ê sū-gia̍p-pō͘: mī-hún-pō͘, si̍t-phín-pō͘, chhī-liāu-pō͘, kah iû-chi-pō͘ .
- 1975 nî in-ūi chiap-koán-tio̍h Tiong-kok Leng-gia̍p Kong-si lâi sêng-li̍p Leng-phín-pō͘, jî-chhiáⁿ kah Meiji Leng-gia̍p lâi ki-su̍t ha̍p-chok.
- 1979 nî chham Bí-kok Lâm-hong Kong-si chhiam-iok, kā 7-Eleven ín ji̍p-lâi keng-êng (iû Ji̍t-pún 7-Eleven siū-khoân); sêng-li̍p chhiau-siong-pō͘.
- 1987 nî khòa-pâi chiūⁿ-chhī. 7-Eleven to̍k-li̍p chiâⁿ-chò Thóng-it Chhiau-siong Kó͘-hūn Iú-hān Kong-si.
- 2016 nî 4-goe̍h chhòng-pān-jîn Ko Chheng-goān kòe-sin.
- 2022 nî 7-goe̍h Thóng-it Khì-gia̍p hām Thóng-it Chhiau-siong soan-pò͘ hun-pia̍t siu-kò͘ Tâi-oân Carrefour 49.5% kah 10.5% ê kó͘-hūn, kau-e̍k kim-gia̍h sin-tâi-phiò 239-ek kah 51-ek. Tī 2023 nî 6-goe̍h 30 kàu-kóa soah.
- 2024 nî 2-goe̍h chhe-2 Thóng-it Khì-gia̍p (Cayman Kûn-tó Thóng-it Khòng-kó͘ Kong-si) jīn-kò͘ Yahoo! Tâioân hoat-hêng ê 2,500-bān bí-kim khó-choán-ōaⁿ kong-si-chè.