Wikipedia:Súi-khùi ê bûn-chiuⁿ/9 goe̍h 27 ji̍t
Lîm Bō͘-seng (林茂生), 1887 nî 10 goe̍h 30 ji̍t chhut-sì, sī Tâi-oân thâu-chi̍t ūi thiat-ha̍k phok-sū. I tī 1929 nî tit-tio̍h Bí-kok Columbia Tāi-ha̍k tiat-ha̍k phok-sū ha̍k-ūi, tńg Tâi-oân liáu-āu khì Tâi-lâm Ko-téng Kang-gia̍p Ha̍k-hāu kà-chheh, sī Eng-gí Tek-gì kho ê chú-jīm kiam tô͘-su-koán ê koán-tiúⁿ. 1945 nî, i chiap chò chiàn-āu Tâi-oân Tāi-ha̍k Bûn-ha̍k-īⁿ īⁿ-tiúⁿ. 1947 nî, 228 Sū-kiāⁿ hoat-seng tang-tiong, ū lâng chhiáⁿ i chhut-bīn hia̍p-siong sū-kiāⁿ ê chhu-lí pān-hoat. I jīn-ûi ha̍k-chiá put-eng-kai khì chhap chèng-tī, kan-na tī 3 goe̍h 4 ji̍t khì Chhú-lí Úi-oân-hoē hoat-piáu ián-káng, hi-bōng ài kong-pêng, ài ū kiàn-sek-sèng, tio̍h bô koh chhut-bīn. Chóng-sī kàu 3 goe̍h 10 ji̍t, poeh ê lâng khì in tau kā chhoā-cháu. Chū án-nē m̄-bat koh khoàⁿ tio̍h i ê lâng. (Tha̍k choân-phiⁿ...)