Commonwealth

Commonwealth sī chi̍t jī Eng-gí tan-jī, chiàu tiûⁿ-ha̍p ū kiōng-êng-thé, kiōng-hô-thé, kiōng-tông-thé, ia̍h kiōng-hô-kok, liân-pang, cho͘-ha̍p téng khoán hoan-e̍k, it-poaⁿ sī ūi tio̍h kiōng-tông lī-ek kiàn-li̍p ê chèng-tī-sèng kiōng-tông-thé.

Gí-goân kap sú-iōng

Commonwealth tāi-seng sī nn̄g jī sio-ha̍p ê phiàn-gí, siá chò common-wealth he̍k-chiá common weal, tī 15 sè-kí tiō ū sú-iōng; chá-kî ê ì-sù sī "kong-chiòng ê hēng-hok". Tông-sî ia̍h sī tùi Latin-gí res publica ("kiōng-hô-kok", chiàu-jī ì-sù sī "kong-chiòng--ê") ê chi̍t chióng hoan-e̍k.

Kàu 17 sè-kí ê sî commonwealth hông ēng lâi piáu-sī chòe-ko khoân-le̍k sio̍k tī jîn-bîn ê chi̍t khoán kok-ka, ia̍h siong-tong kiōng-hô-kok ia̍h bîn-chú-kok ê ì-sù.

Āu--lâi chit jī koh hông ēng chò chi̍t kóa chèng-tī si̍t-thé ê hō-miâ, pí-lūn Ò-chiu, Bahamas kap Dominica, in-ê koan-hong Eng-gí miâ lóng tàu Commonwealth. Tī Bí-kok, ū 4-ê chiu kap 2-ê léng-thó͘ hō-miâ mā ēng commonwealth. Koh ū chi̍t khoán sī to-kok-ka ê cho͘-ha̍p hō-miâ, pí-lūn Commonwealth of Nations.