Wikipedia (chū-iû ê pek-kho-choân-su) beh kā lí kóng...
Lí Teng-hui tī 1988 nî 1 goe̍h kè-jīm Tiong-hôa Bîn-kok Chóng-thóng liáu-āu, Chiúⁿ-ka chip-chèng sî-tāi kiat-sok, Tâi-oân-lâng tē-it pái chhut-jīm kok-ka goân-siú, Tâi-oân siā-hōe iau-kiû chèng-tī bîn-chú-hòa ê ho͘-siaⁿ ji̍t-ek ko-tiòng. 1990 nî, tē-it kài Kok-bîn Tāi-hōe tāi-piáu soán-kí chóng-thóng sî ín-hoat Saⁿ-goe̍h ha̍k-ūn, Tiong-hôa Bîn-kok Chèng-hú tī 1991 nî kap 1992 nî oân-sêng kok-hōe gī-oân choân-bīn kái-soán liáu-āu, Bîn-chú Chìn-pō͘ Tóng kap Lí Teng-hui chóng-thóng tiō khai-sí thui-tōng Chóng-thóng kap Hù Chóng-thóng tī Tâi-oân ê kong-bîn ti̍t-chiap soán-kí kap pā-bián, tān-sī in-ūi Tiong-kok Kok-bîn Tóng lāi pó-siú-phài chó͘-jiáu bô-hoat-tō͘ si̍t-hiān. Ūi-tio̍h beh pī-bián tī 1994 nî 12 goe̍h chek-chiong siú-tō͘ bîn-soán ê Tâi-oân-séng Séng-tiúⁿ ín-hoat Yeltsin hāu-èng, só͘-í tī 1994 nî 7 goe̍h siu-kái pēng tòng-kiat pō͘-hūn hiàn-hoat, tī soán-kí chóng-thóng kap hù-chóng-thóng sî sek-iōng Tiong-hôa Bîn-kok Hiàn-hoat Cheng-siu Tiâu-bûn, kái-piàn chìn-chêng iû Kok-bîn Tāi-hōe tāi-piáu kàn-chiap soán-kí ê hong-sek. 1996 nî 3 goe̍h 23 hō, tī Tiong-hôa Bîn-kok chū-iû tē-khu (Tâi-oân, Phêⁿ-ô͘, Kim-mn̂g kap Má-chó͘) kí-hêng chóng-thóng ê tē-it pái ti̍t-chiap soán-kí.
