Chú ê Kî-tó-bûn

Chú ê Kî-tó-bûn ia̍h-hō Chú-tó-bûn sī Ki-tok-kàu chòe-chiong iú-miâ ê kî-tó bûn. Kin-kì Sèng-keng ê kì-chài, Iâ-so͘ ê sù-tô͘ chhéng-kiû i chí-tō in kî-tó. Chú ê kî-tó bûn sī kì-chài tī Sin-iok Sèng-keng Má-thài Hok-im-Su tē la̍k chiuⁿ káu chat chì cha̍p-saⁿ chat, sī San-siōng ê Kàu-hùn ê it-pōo-hūn. Lēng-gōa it-phiⁿ sio-tâng ê kî-tó bûn sī kì-chài tī Lō͘-ka Hok-im cha̍p-it-chiuⁿ.

Bân-lâm-gí ê Hoan-e̍k

Ē-kha sī kàu-hōe koàn-sì sú-ēng ê keng-chat, kì-chài tī Má-thài Hok-im 6:8-15.

Sin-kū-iok ê Sèng-keng (Pa-khek-lé ê Ē-mn̂g-ōe pán-pún)

Só͘-í lín bo̍h-tit o̍h in; in-ūi lín bē kiû I ê tāi-seng, lín ê Pē í-keng chai lín só͘ khiàm-ēng ê.

Só͘-í lín tio̍h án-ni kî-tó:

“Goán tī thiⁿ-ni̍h ê Pē, Goān lí ê miâ sèng.

Lí ê kok lîm-kàu.

Lí ê chí-ì tit chiâⁿ, tī tōe-ni̍h chhin-chhiūⁿ tī thiⁿ-ni̍h.

Goán ê ji̍t-si̍t, kin-á-ji̍t hō͘ goán.

Sià-bián goán ê ko͘-hū, chhin-chhiūⁿ goán ia̍h ū sià-bián ko͘-hū goán ê lâng.

Bo̍h-tit chhōa goán ji̍p tī chhì, tio̍h kiù goán thoat-lī hit ê pháiⁿ-ê.

(In-ūi kok, kôan-lêng, êng-kng lóng sī Lí ê, tāi-tāi bô-chīn. Amen.)”

“In-ūi lín nā sià-bián lâng ê kè-sit, lín ê Thiⁿ Pē ia̍h beh sià-bián lín.

Lín nā bô sià-bián lâng ê kè-sit, lín ê Pē ia̍h bô beh sià-bián lín ê kè-sit.”

Hiān-tāi Tâi-gú E̍k-pún (TTV, 2021 pán-pún)

Lín m̄-thang kap in siâng-khoán; in-ūi iáu-bē kiû í-chêng, lín ê Pē í-keng chai lín ê su-iàu. Só͘-í, lín tio̍h án-ni kî-tó:

Goán ê Thiⁿ-pē:

Goān lí ê sèng-miâ siū chun-chông.

Goān lí si-hêng chú-koân;

goān lí ê chí-ì si̍t-hiān,

tī tōe-chiūⁿ chhin-chhiūⁿ tī thiⁿ-téng.

Kiû lí kin-á-ji̍t sù goán su-iàu ê chia̍h-mi̍h.

Kiû lí sià-bián goán ê ko͘-hū,

chhin-chhiūⁿ goán mā ū sià-bián ko͘-hū goán ê lâng.

Kiû lí m̄-thang hō͘ goán hām-lo̍h tam-tng bōe khí ê chhì-thàm,

kiù goán thoat-lī hit-ê Siâ-ok-chiá.

(In-ūi chú-koân, koân-lêng, êng-kng lóng sio̍k lí, ti̍t-kàu éng-oán. Amen!)

“Lín nā sià-bián lâng ê kè-sit, lín ê Thiⁿ-pē mā ōe sià-bián lín; lín nā bô sià-bián lâng, lín ê Thiⁿ-pē mā bōe sià-bián lín ê kè-sit.”

Siōng-bóe ê Êng-iāu-siōng

Chú-tó-bûn lō͘-bóe, tiāⁿ-tiāⁿ ōe ke chi̍t-tōaⁿ kî-tó-sû (Thian-chú-kàu-hōe kā i hō-chò "Êng-iāu-siōng"), tī Thian-chú-kàu-hōe kap Tang-chèng-kàu-hōe ê lé-gî si̍p-koàn tang-tiong.

In-ūi Kok, koân-lêng, êng-kng lóng sī lí só͘-ū, tāi-tāi bô chīn. Amen!

Chit-tōaⁿ siōng-êng (頌榮) khah chē sī ēng tī Chú-ji̍t ê sèng-lé-gî tang-tiong.

Tī sèng-keng ê goân-bûn lāi-té, A-lân-bûn ê pán-pún bô, Hi-lia̍p-bûn ê pán-pún soah ū.

Tī Má-thài Hok-im kap Lō͘-ka Hok-im ê goân-bûn lāi-té bô siōng-bóe ê "Amen", kàu-hōe ê lé-gî ē tī siōng-bóe-á ka-siōng "Amen" lâi piáu-sī khéng-tēng kap tông-ì ê ì-sù.